Keimoes se nuwe rekenaarsentrum bevorder landelike digitale vaardighede

GEMSBOK-KEIMOES: Kleinboere, leerders en inwoners van Eksteenskuil, naby Keimoes, het nou - na die amptelike bekendstelling van ‘n nuwe gemeenskapsrekenaarsentrum - toegang tot digitale opleiding en aanlyn hulpbronne.

Minister van Kommunikasie en Digitale Tegnologieë, Solly Malatsi, het onlangs die Eksteenskuil-rekenaarsentrum amptelik geopen. Malatsi het by die bekendstelling gesê die fasiliteit verteenwoordig meer as bloot ‘n gebou wat met rekenaars toegerus is. Dit was ‘n belegging in mense en in die beginsel dat “waar jy woon nooit die geleenthede wat vir jou beskikbaar is, moet bepaal nie”.

Hy het gesê dat landelike gemeenskappe te lank aan die verkeerde kant van die digitale kloof gebly het as gevolg van beperkte toegang tot tegnologie, konnektiwiteit en digitale vaardighede.

Die inisiatief sal na verwagting digitale vaardigheidsopleiding aan leerders, jongmense, werklose inwoners, plaaswerkers en kleinskaalse boere bied.

Die sentrum sal na verwagting kinders toegang gee tot opvoedkundige hulpbronne, terwyl jongmense rekenaarvaardighede sal kan ontwikkel, werk sal kan soek en verdere onderwysgeleenthede sal kan verken. Inwoners sal ook digitale platforms kan gebruik om toegang tot regeringsdienste en ander aanlyn hulpbronne te verkry.

Vir boere kan die sentrum toegang bied tot weerinligting, markpryse, finansiële dienste, opleidingsmateriaal en nuwe boerderytegnieke. Digitale platforms kan boere ook help om meer doeltreffend met kopers, verskaffers en regerings ondersteuningsprogramme te skakel.

Die Eksteenskuil Landboukoöperatief verteenwoordig meer as 100 kleinskaalse boere in die gebied. Die gemeenskap is bekend vir sy rosyntjieproduksie langs die Oranjerivier.

Opleiding by die sentrum sal na verwagting administrasie, finansiële rekordhouding en ander kantoorfunksies insluit wat nodig is om toenemend mededingende landboubesighede te bedryf.

‘n Belegging deur die Kgodiso-ontwikkelingsfonds (KDF), wat deur PepsiCo gestig is na die verkryging van Pioneer Foods, het die projek moontlik gemaak. KDF het die projek beskryf as sy derde multimiljoenrand-belegging in die gemeenskap, hoewel die presiese waarde van die rekenaarsentrum nie bekend gemaak is nie. KDF-trustee Christo van der Rheede het die sentrum beskryf as “’n poort na kennis, lewenslange leer, entrepreneurskap en ekonomiese deelname”. Hy het gesê dit sal boere help om hul besighede te moderniseer, jongmense toe te rus vir die digi- tale ekonomie, vroulike entrepreneurs te ondersteun en plaaslike ondernemings te versterk.

Die projek is ontwikkel met die ondersteuning van die Eksteenskuil Landboukoöperatief en strategiese vennote, insluitend PepsiCo, Raisins SA, die Vine Academy en Model Farm, en die Departement van Kommunikasie en Digitale Tegnologieë. Malatsi het die gemeenskap aangespoor om die fasiliteit te beskerm en ten volle te benut, en gesê die sukses daarvan sal uiteindelik gemeet word aan die geleenthede wat dit vir leerders, werksoekers, entrepreneurs en boere skep.

Jy kan elke Vrydag jou gratis Gemsbok op WhatsApp kry! Volg die skakel - https://whatsapp.com/channel/0029VbCfMcCLtOj9eXoohS29