Ons Johanna - trots Namibies

Uit die land van meer as drie miljoen stemme, staan sy trots, Namibiër, Afrikaan en bo alles, mens.


So beskryf Namibië se Johanna Swartbooi (28) haarself waar sy “gereed en geanker in my tuiste en reikend na die heelal” elke Namibiër op die internasionale verhoog van die 74ste Mej. Heelal-kompetisie in Thailand verteenwoordig. Gebore op Keetmanshoop en getoë op Vaalgras in die ||Kharasstreek, is Johanna trots Nama en praat sy onder meer Khoekhoegowab.


Sy dra saam met haar die warmte van die vroue wat haar groot gemaak het, sê Johanna en die liefdevolle arms van ‘n gemeenskap wat in haar geglo het nog lank voordat sy dit self gedoen het. “Ek gaan nie net om deel te neem nie, maar om hoop, erfenis en hart te verteenwoordig. Want om uit te staan is om ‘n lig vir ander te skyn en daardie verantwoordelikheid dra ek nie met druk nie, maar met ‘n doel,” sê Johanna trots.


Sy was in 2019 tweede finalis in die Mej. Namibië-kompetisie en het met die toekennings vir Top Model en Body Strong weggestap. In 2021 en 2023 tydens die semi- en finale van die kompetisie was sy ‘n motiveringspreker en vrywilliger. Sy het ‘n BA-graad in besigheidsadministrasie waartydens sy gespesialiseer het in innovering en die bestuur van entrepreneurskap, terwyl sy ook kwalifikasies in sake- en bemarkingsbestuur het. In haar beroepslewe was Johanna van ‘n projekbestuurder tot die senior private sekretaresse vir die spesiale raadgewer van die minister van arbeid, nywerheidsverhoudinge en werkskepping.


In 2019 het Johanna ‡Nu/Gôa Accessories and Apparel CC gestig, ‘n handelsmerk wat verbind is tot volhoubare mode en kulterele storievertelling. Die naam ‡Nu/Gôa beteken Swart Kind in Khoekhoegowab en weerspieël haar diep verbintenis tot identiteit en erfenis. Johnna se 2023 Vaalgras Collection, geïnspireer deur die ‘polka dot’-drag en tradisies van haar gemeenskap, spog met handgemaakte glaskrale en herwinde material in ‘n unieke samesmelting van kultuur en kontemporêre ontwerp.


Buiten vir mode is Johanna ‘n passievolle voorstander vir kreatiwiteit as ‘n dryfveer vir jeugbemagtiging en ekonomiese groei. Verlede jaar het sy ook die ||Hapo Initiative, ‘n program ontwerp om kreatiewe entrepreneurs met slypskole vir vaardigheidsontwikkeling toe te rus, in die lewe geroep in ‘n poging om werkskepping en selfonderhoud aan te spoor.


Die wenner word op 21 November in Pak Kret, Nonthaburi, in Thailand deur verlede jaar se wenner, Victoria Kjær Theilvig van Denemarke gekroon. Republikein staan bankvas agter Johanna en hou duimvas dat sy die kroon vir elke Namibiër sal huis toe bring.