’n Fees sonder brieke

Die Kalahari Kuierfees in Upington gaan weer vanjaar ’n heerlike kuiergeleentheid wees, met baie om oor drie dae te sien en te doen.


“Die fees het in 1993 ontstaan, dus 32 jaar gelede, toe die Rosyntjiefees deur SAD begin is, waarna die Kalahari Kuierfees sewe jaar later, op 7 November 2000, gestig is. Dit is dus op die komende Vrydag, op ons feesdatum, presies 25 jaar gelede,” sê Danie Bruwer, voorsitter van die Kalahari Kuierfees. Toe Die Eiland in 2016 en 2017 in die mark was, is die fees op die Landbou-Expo-terrein aangebied. “In 2022, ná Covid, was ons vir twee jaar by die Desert Palace Casino gehuisves, maar as gevolg van ons groot Amusement for Africa-pretpark vanjaar, is ons terug by Die Eiland.” Hy voeg by: “Vanjaar is daar 80 stalletjies met ’n wye verskeidenheid produkte om van te kies en te keur. Sowat 1 000 mense het reeds op ons sosialemediabladsye aangedui dat hulle beslis ’n draai gaan kom maak.”


Program - Die hekke open Donderdag om 10:00. Vaughs Trading bied kindervermaak (toegang gratis vir kinders onder ses jaar), en die pretpark sal vanaf 15:00 oop wees. Die APD-rolstoelrugby begin om 16:00, en die jongspan word aangemoedig om deel te neem. Jaco Ka’Laari en Rooies sal ook vermaak verskaf met Elke Vuur Vertel ’n Storie (18:00). Die kunstenaars Karlien Husselman, Hugo Nieuwoudt en Jennifer Zamudio betree die verhoog tussen 19:00 tot 23:00.


Vrydag gaan die pret voort met onder meer Discount Boards se plaaslike sterkman-kompetisie (17:00), die Mej. en Mnr. Noord-Kaap-skoonheidskompetisie (18:00 tot 20:00), en die Kalahari Kuierfees Meerkatmyl. Nadia Louw, die Saxby Twins en Early B sorg vir vermaak (20:00 tot 23:00).


’n Propvol program wag Saterdag ook op feesgangers. Die verrigtinge skop reeds om 06:00 af met die Kalahari Kuierfees-halfmarathon, fietsry- en 10 km-drafkompetisie. Die Sergio Clearing & Forwarding-hengelkompetisie begin om 07:00 en die skale sluit om 15:00. Daar sal ook ’n Toyota-stap vir Bybels wees (08:00),’n Kolskoot Vleismark-ribbraaikompetisie en ’n armdrukkompetisie met Junior Burger en JP Zietsman (13:00). Ouma Sarie, The Rockettz New Generation en Rooksien sorg vir musiek (17:00 tot 21:00). Die wedstryd tussen Suid-Afrika en Frankryk word om 22:00 op grootskerms vertoon.


Toegang - Kaartjies kos R40 per kind en R80 vir volwassenes, terwyl toegang gratis is vir kinders onder ses jaar en pensioenarisse op Donderdag. Kinders betaal R50, en volwassenes en pensioenarisse R100, met gratis toegang vir kinders onder ses jaar op Vrydag en Saterdag. Naweekkaartjies is beskikbaar teen R120 per kind en R200 per volwassene. Kry jou kaartjies aanlyn by Open Tickets en besoek Facebook: Kalahari Kuierfees | Instagram: @kalaharikuierfees vir meer inligting.